မြန်မာနိုင်ငံတွင် ထူးချွန်သော ဂေါက်သီးအားကစားသမားများပေါ်ထွက်လာစေရေးအတွက် Shwe Mann Golf Resort မှ အဓိက ကူညီပံ့ပိုးသော မြန်မာပြည်တွင်း ပတ်လည် ဂေါက်သီးရိုက်ပြိုင်ပွဲ အဋ္ဌမပွဲစဉ်၏ ဖွင့်ပွဲ အခမ်းအနားကို နိုဝင်ဘာ (၁၉) ရက်နံနက်ပိုင်း တွင်မန္တလေးမြို့ရှိ ရွှေမန်းတောင်ဂေါက်ကွင်း၌ ကျင်းပသည်။

  ရှေးဦးစွာ ပြိုင်ပွဲဝင်ဂေါက်သီးရိုက် အားကစားသမားများသည် သတ်မှတ်ထားသည့် အမှတ်(၁) တီခုံ၌ နေရာယူကြပြီး မန္တလေးတိုင်းဒေသကြီးအစိုးရအဖွဲ့ ၀န်ကြီးချုပ်ဦးရဲမြင့်၊ အလယ်ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ်စိုးထွဋ်၊ မန္တလေးတိုင်း ဒေသကြီး စည်ပင်သာယာရေးဝန်ကြီးဌာန ၀န်ကြီး မန္တလေးမြို့တော်ဝန် ဦးအောင်မောင်း၊ မြန်မာနိုင်ငံဂေါက်သီးအဖွဲ့ချုပ်နှင့် မြန်မာပီဂျီအေဥက္ကဋ္ဌ ဦးကိုကိုအေး၊ မြန်မာနိုင်ငံဂေါက်သီးအဖွဲ့ချုပ်အထက်မြန်မာပြည်ဆပ်ကော်မတီဥက္ကဋ္ဌ နှင့် Shwe Mann Taung Golf Resort ဒါရိုက်တာဦးတင်ကိုကို၊ Shwe Mann Taung Golf Resort ဒါရိုက်တာဦးထွန်းထွန်းလင်းတို့မှအလှည့်ကျ ဂေါက်သီးရိုက်၍ ပြိုင်ပွဲအား ဖွင့်လှစ်ပေးကာ ပထမနေ့ (၁၈)ကျင်းပြိုင်ပွဲကို စတင်ကျင်းပသည်။

ပြိုင်ပွဲတွင် Professional အဆင့် (၃၄)ဦး၊ အပျော်တမ်းအဆင့် အမျိုးသား (၁၀၅)ဦး၊ အပျော်တမ်းအဆင့် အမျိုးသမီး (၂၆)ဦး၊ စုစုပေါင်းအားကစားသမား (၁၆၅)ဦးဝင်ရောက်ယှဉ်ပြိုင်ကြသည်။